កញ្ញា ឡូរ៉ា ដែលអមដំណើរដោយអ្នកលេងហ្គីតាបាសរបស់ក្រុមតន្ត្រី The Like Me’s គឺកញ្ញា Helena Hong បានធ្វើដំណើរពីសហរដ្ឋអាមេរិកមកដល់ព្រលានយន្តហោះ អន្តរជាតិភ្នំពេញ កាលពីព្រឹកថ្ងៃចន្ទ ហើយកញ្ញាគ្រោងនឹងស្នាក់នៅក្នុងរាជធានីភ្នំពេញរយៈពេលជាង ១ខែ។
កញ្ញា ឡូរ៉ា បានប្រាប់ពិធីករប៉ុស្តិ៍ MyTV យ៉ាងដូច្នេះថា “ខ្ញុំមានអារម្មណ៍ហាក់ដូចជាស្ថិតនៅស្រុកកំណើត។ ខ្ញុំមានអារម្មណ៍រំភើប រីករាយ ដែលបានមកលេងស្រុកខ្មែរ និងជួបជុំបងប្អូន មិត្តភក្ដិ និងអ្នកគាំទ្ររបស់ខ្ញុំ”។
កញ្ញា ឡូរ៉ា ពុំមានគម្រោងរៀបចំការប្រគំតន្ត្រីជាផ្លូវការនៅទីនេះទេ ប៉ុន្តែ កញ្ញាគ្រោងនឹងបង្ហាញខ្លួននៅក្នុងកម្មវិធីរបស់ទូរទស្សន៍ CTN និង MyTV។ កញ្ញាក៏នឹងថតវីដេអូចម្រៀងមួយចំនួនផងដែរ ខណៈដែលស្នាក់នៅក្នុងប្រទេសកម្ពុជា។ កញ្ញា ឡូរ៉ា ថ្លែងបន្ថែមយ៉ាងដូច្នេះ “នេះជាការធ្វើដំណើរជាលក្ខណៈការងារ។ យើងមានកាលវិភាគដ៏មមាញឹក ប៉ុន្តែយើងពិតជាចង់ជួបជាមួយអ្នកគាំទ្ររបស់យើងខ្លាំងណាស់”។
សមាជិកក្រុមតន្ត្រី The Like Me’s កញ្ញា Monique Coquilla និង Loren Alonzo ត្រូវគេរំពឹងថានឹងមកដល់ប្រទេសកម្ពុជានៅចុងសបា្ដហ៍នេះ។
ថ្មីៗនេះ ក្រុមតន្ត្រី The Like Me’s បានចេញផ្សាយវីដេអូចម្រៀងបទ “ផ្កាព្រហាមរីកពព្រាយ” និង
បទ “ស្វារាំមុនឃីស” ជាផ្លូវការ នៅក្នុងប្រទេសកម្ពុជា។ បទ“ផ្កាព្រហាមរីកពព្រាយ” ដែលមានអ្នកទស្សនានៅលើអ៊ិនធើណិតជាង ៥០០.០០០នាក់ គឺជាបទចម្រៀងដំបូងបង្អស់របស់ក្រុមតន្ត្រី The Like Me’s ដែលបានចេញផ្សាយនៅកម្ពុជា។ បទបន្ទាប់ គឺបទ“ស្វារាំមុនឃីស” ដែលកំពុងចាក់ផ្សាយនៅលើកញ្ចក់ទូរទស្សន៍ MyTV និង CTN។
The Like Me’s គឺជាក្រុមតន្ត្រីដែលមានសមាជិកសុទ្ធតែស្រី និងមានមូលដ្ឋាននៅរដ្ឋកាលីហ្វ័រញ៉ាភាគខាងជើង។ សមាជិកក្រុមតន្ត្រី រួមមាន ឡូរ៉ា ម៉ម, ហេឡិណា ហុង, Monique Coquilla និង Loren Alonzo។ ឡូរ៉ា និង ហេឡិណា ទាំងពីរនាក់ គឺជាអាមេរិកាំងដើមកំណើតខ្មែរ។ ចំណែកឯ Monique Coquilla និង Loren Alonzo គឺជាជនជាតិអាមេរិកាំង ដើមកំណើតហ្វីលីពីន។
ក្រុមតន្ត្រី The Like Me’s បានទទួលប្រជាប្រិយភាពទាំងនៅក្នុងស្រុក និងក្រៅស្រុក នៅលើអ៊ិនធើណិត ជាមួយនឹងការយកបទចម្រៀងខ្មែរបុរាណទៅច្រៀងតាមបែបទំនើប។ បេសកកម្មរបស់ក្រុមតន្ត្រីនេះ គឺដើម្បីធ្វើឲ្យឆាកតន្ត្រីរបស់ប្រទេសកម្ពុជារស់ឡើងវិញ តាមរយៈការផលិតបទចម្រៀងដើមដោយខ្លួនឯង។
អ្នកចូលចិត្តបទចម្រៀង ដែលមានបំណងចង់ទាញយកបទចម្រៀង “ស្វារាំមុនឃីស” របស់ក្រុម The Like Me’s សម្រាប់ទូរស័ព្ទដៃ អាចផ្ញើ SMS លេខកូដនេះ 703408 ទៅកាន់លេខ 2727៕ S
បើចង់ជ្រាបច្បាស់សូមទស្សនាវីដេអូខាងក្រោម៖
ប្រភពពី៖CEN
