ថ្មីៗនេះ ប្រភពព័ត៌មានមិនច្បាស់ការណ៍មួយបានឱ្យដឹងថា ក្រុមហ៊ុន Google គ្រោងនឹងបង្កើតវ៉ែនតាប្រភេទថ្មីមួយ ដែលមានលក្ខណៈពិសេសជាងវ៉ែនតាប្រភេទមុនៗ គឺអាចស្វែងរកទីតាំង រកព័ត៌មាន និងអានអ៊ីម៉ែលបានដោយផ្ទាល់តែម្តងពីកញ្ចក់វ៉ែនតានោះ។
វ៉ែនតាពិសេសនេះ ត្រូវបានបញ្ជាតាមការប្រើសំឡេង។ វាអាចប្រាប់ផ្លូវតាមរយៈ GPS ពីកន្លែងដែលអ្នកកំពុងស្ថិតនៅទីកាន់ទីតាំងគោលដៅរបស់អ្នកបាន។ ក្រៅពីនេះ វាត្រូវបានគេបំពាក់ដោយប្រព័ន្ធ Android ដោយអ្នកអាចអានអ៊ីម៉ែល ឬស្វែងរកព័ត៌មាន ឬប្រើ Video Chat បានតាមរយៈអេក្រង់វ៉ែនតាតែម្តង ដោយមិនចាំបាច់ប្រើកុំព្យូទ័រ ឬ Tablet នោះឡើយ។
បន្ទាប់ពីព័ត៌មាននេះបានបែកធ្លាយឡើង អ្នកនាំពាក្យមួយរូបរបស់ក្រុមហ៊ុន Google បានឱ្យដឹងថា “ព័ត៌មាននេះ គឺជារឿងដ៏គួរឱ្យចាប់អារម្មណ៍មួយ ព្រោះនេះគឺជាការបោះទុននៅក្នុងជំនួញ ប៉ុន្តែ ខ្ញុំសូមមិនបកស្រាយលម្អិតពីពាក្យចចាមអារ៉ាមនោះឡើយ”។
មកទល់ពេលនេះ នៅមិនទាន់មានព័ត៌មានលម្អិតពីការចេញលក់នៅឡើយនោះទេ ព្រោះបច្ចុប្បន្ន វាកំពុងត្រូវគេធ្វើតេស្តក្នុងមន្ទីរពិសោធន៍៕
ប្រភពពី៖
AKT
____________________________________________
បញ្ជូនព័ត៌មាននេះទៅបណ្តាញទំនាក់ទំនងរបស់អ្នក :
